Landsbanki nýrra tíma 

Kjarninn í stefnu Landsbankans, Landsbanki nýrra tíma, er að einfalda líf viðskiptavina með aðgengilegri, öruggri en jafnframt persónulegri bankaþjónustu. Jafnframt endurspeglar stefnan kraft til stöðugrar framþróunar. 

Hjón úti í náttúru

Innleiðing stefnunnar hófst í ársbyrjun 2021. Landsbanki nýrra tíma styður með beinum hætti við tilgang Landsbankans sem er að vera traustur banki fyrir farsæla framtíð. Sú setning fangar vel kjarna bankans og á rætur sínar að rekja allt til stofnunar Landsbanka Íslands árið 1886.  

Gildi 

Gildi Landsbankans er traust. Traust er lykilþáttur í allri starfsemi bankans hvort sem horft er til samskipta við viðskiptavini, birgja, samstarfsfólk eða átt er við rekstur bankans og almenna starfsemi. Viðskiptavinir geta treyst því að við séum til staðar og að rekstur bankans sé í öruggum höndum. 

Stoðir stefnunnar  

Stefnan er studd af fjórum stoðum sem byggja upp þá grunnþætti sem nauðsynlegir eru til að ná framúrskarandi árangri.  

Stefnustoð 1: Jákvæð áhrif
Stefnustoð 2: Ánægðir viðskiptavinir
Stefnustoð 3: Stöðug framför
Stefnustoð 4: Við elskum árangur

Jákvæð áhrif. Landsbankinn er hluti af umhverfi sínu, íslensku samfélagi. Við leggjum ríka áherslu á að vera jákvætt hreyfiafl um allt land og stuðla að farsælli framtíð lands og þjóðar. Jákvæð áhrif bankans eru mæld með arðgreiðslum, árangri í sjálfbærnivinnu og þátttöku í samfélaginu. 

Traustur rekstur hefur skilað bankanum jöfnum og góðum hagnaði og stutt við reglulegar arðgreiðslur. Verði tillaga bankaráðs til aðalfundar árið 2025 samþykkt munu arðgreiðslur bankans til eigenda á árunum 2013-2025 samtals nema 210,5 milljörðum króna. Á undanförnum árum hefur hlutfall grænnar fjármögnunar stöðugt aukist og er nú orðið 61% af erlendri fjármögnun bankans. Hæfar eignir til sjálfbærra verkefna fara sömuleiðis vaxandi og fellur nú rúmur 251 milljarður króna undir sjálfbæru fjármálaumgjörðina. Bankinn er traustur bakhjarl íþrótta-, æskulýðs- og framþróunarstarfs um allt land og varði um 200 milljónum króna á árinu í um 600 styrki og samstarfssamninga af þessum toga. Sérfræðingar bankans eru einnig áberandi í umræðunni um hagkerfið og ýmis samfélagsmál, auk þess sem mikið er lagt upp úr fræðslu um fjármál á breiðum grunni. 

Ánægðir viðskiptavinir. Áhersla okkar hér er að einfalda viðskiptavinum lífið og fanga jafnframt mannlega þáttinn í þjónustu Landsbankans. Við finnum stöðugt leið til að gera enn betur og leysa áskoranir á farsælan hátt. Í því felst frumkvæði og það hugarfar sem Landsbanki nýrra tíma byggir á. Við setjum ánægju viðskiptavina í fyrsta sæti og viljum bjóða upp á aðgengilega og örugga bankaþjónustu hvar og hvenær sem er.  

Vörumerki bankans er sterkt og mælist í sérflokki samkvæmt EMC markaðsrannsóknum. Lögð er áhersla á að koma til móts við þarfir viðskiptavina allan sólarhringinn, með öflugum sjálfsafgreiðslulausnum ásamt persónulegri þjónustu sem starfsfólk bankans innir af hendi um allt land. Fólk finnur að við erum betri saman sem endurspeglast í vaxandi ánægju viðskiptavina, auknum innlánum og fjölgun viðskiptavina. 

Stöðug framför. Stöðugur og traustur rekstur ásamt góðum efnahag eru forsenda þess að skapa rými til framfara þar sem starfsemin verður stöðugt snjallari.  

Nýjungar í tækni nýtast ekki einvörðungu í þróun á þjónustu fyrir viðskiptavini heldur einnig í að treysta rekstur bankans og tryggja með sem bestum hætti stöðugleika í fjármálaþjónustu. Traustur rekstur snýst að miklu leyti um það sem ekki sést en er engu að síður undirstaða og forsenda fyrir framþróun. Þessi hluti byggir ekki síst á metnaði og jákvæðu hugarfari til breytinga. Á bak við góðan árangur stendur öflugur hópur starfsfólks sem sinnir mikilvægum verkefnum tengdum rekstri, skilvirkni, framþróun, gæðum, fjármögnun, uppgjöri, eftirliti og fleiri ómissandi þáttum.  

Þetta sést m.a. á því að þrátt fyrir að efnahagur bankans hafi stækkað um 32% að raunvirði á síðustu 10 árum hefur stöðugildum fækkað, rekstrarkostnaður minnkað og kostnaðarhlutfall aldrei verið lægra. 

Við elskum árangur. Vinnustaðurinn á að vera umhverfi þar sem aðstæður til framúrskarandi árangurs fyrir viðskiptavini og starfsfólk eru sem bestar. Við elskum árangur vísar í persónulegan árangur en líka sameiginlegan árangur sem jákvæður og lausnamiðaður hópur starfsfólks þvert á bankann nær og birtist í framúrskarandi þjónustu. Fyrirtækjamenningin er árangursdrifin með hagsmuni viðskiptavina, samfélags, samstarfsfólks og eigenda í huga. 

Öflug fræðslumenning ríkir innan bankans og lögð er mikil áhersla á uppbyggingu framúrskarandi starfsumhverfis og árangursdrifinnar vinnustaðamenningar. Landsbankinn er eftirsóttur vinnustaður enda kemur fram í könnunum að 88% starfsfólks mælir með bankanum sem frábærum vinnustað. 

Skýr markmið til stuðnings stefnu 

Styrkur Landsbankans felst í starfsfólkinu, sterkri menningu, góðri ímynd og orðspori. Hann felst í viðskiptasamböndum og hversu vel hefur tekist að ná til viðskiptavina. Styrkurinn felst líka í traustum efnahag sem getur staðið af sér áföll.  

Forsenda árangurs er að allir stefni í sömu átt. Landsbanki nýrra tíma liggur til grundvallar viðskiptaáætlunar bankans hverju sinni og mótar það sem bankinn tekur sér fyrir hendur. Skýr lykilmarkmið, studd með áhersluverkefnum, markvissri framkvæmd og vel ígrunduðum ákvörðunum með langtímahagsmuni að leiðarljósi skila sér í traustum banka fyrir farsæla framtíð.  

Þetta er Landsbanki nýrra tíma. 

Vefkökur

Með því að smella á „Leyfa allar“ samþykkir þú notkun á vefkökum til þess að auka virkni vefsins, greina vefnotkun og aðstoða við markaðssetningu.

Nánar um vefkökur