Stjórn og stjórnarhættir

Einstaklingar

Einstaklingssvið annast alla þjónustu vegna fjármála einstaklinga, þ.m.t. þróun á stafrænum lausnum. Lögð er áhersla á að veita framúrskarandi þjónustu sem byggir á hagnýtingu gagna bankans. Við viljum að viðskiptavinir geti fengið persónulega ráðgjöf í útibúum og sinnt öllum helstu bankaerindum eftir stafrænum þjónustuleiðum. Þjónusta við minni og meðalstór fyrirtæki á landsbyggðinni er í höndum viðkomandi útibúa í náinni samvinnu við Fyrirtækjasvið.

Fyrirtæki

Þjónusta og fjármögnun fyrir fyrirtæki, sveitarfélög og stofnanir er á höndum Fyrirtækjasviðs. Aukin áhersla er lögð á stafræna þjónustu, sér í lagi hjá litlum og meðalstórum fyrirtækjum, auk aðgerða í sjálfsafgreiðslu. Sérhæfðir viðskiptastjórar annast þjónustu við fyrirtæki og lögaðila í öllum greinum íslensks atvinnulífs. Fyrirtækjasvið veitir einnig yfirgripsmikla og vandaða ráðgjöf um kaup, sölu og samruna fyrirtækja.

Eignastýring og miðlun

Eignastýring og miðlun býður efnameiri einstaklingum, fyrirtækjum og fjárfestum aðstoð við að finna réttu lausnirnar í fjárfestingum og eignauppbyggingu. Boðið er upp á víðtæka þjónustu á sviði eignastýringar, bæði í formi einkabankaþjónustu og fagfjárfestaþjónustu, auk þjónustu sem snýr að sölu og miðlun verðbréfa, gjaldeyris og afleiðna fyrir fagfjárfesta og stærri viðskiptavini. Lögð er áhersla á persónulega þjónustu, ábyrga ráðgjöf og upplýstar ákvarðanir.

Fjármál

Fjármögnun bankans, lausafjárstýring og viðskiptavakt er í höndum sviðs Fjármála. Uppgjör, bókhald og áætlanagerð heyra einnig undir sviðið, ásamt lána- og viðskiptaumsjón og málefni sem tengjast sjálfbærni.

Upplýsingatækni

Upplýsingatæknisvið ber ábyrgð á rekstri, öryggi og framþróun stafrænna innviða bankans. Starfsemin einkennist af þverfaglegu samstarfi og samvinnu við önnur svið bankans við að veita og þróa framúrskarandi tæknilausnir og stafræna þjónustu. Rík áhersla er lögð á að efla hagnýtingu gagna í öllu starfi bankans og að tryggja að bankinn verði áfram leiðandi í hagnýtingu upplýsingatækni á íslenskum fjármálamarkaði.

Áhættustýring

Áhættustýring ber ábyrgð á virkni áhættustjórnunarumgjarðar samstæðunnar. Sviðið ber einnig ábyrgð á upplýsingagjöf um áhættustöður til mismunandi deilda og nefnda innan bankans og ytri eftirlitsaðila.

Samskipti og menning

Sviðið hefur yfirumsjón með ytri og innri samskiptum bankans og gegnir jafnframt lykilhlutverki við að móta og hlúa að vinnustaðamenningunni. Undir sviðið falla mannauðsmál, markaðsmál, fræðsla fyrir starfsfólk og viðskiptavini, samskipti, greiningar, rekstur á eignum bankans, öryggismál og starfsemi mötuneytis.

Regluvarsla, Lögfræðiþjónusta og Stefnumótun og ferlar

Þvert á bankann starfa þrjár deildir sem heyra beint undir bankastjóra. Regluvarsla viðhefur áhættumiðað innra eftirlit með því að stjórnendur og starfsfólk starfi í samræmi við þær stefnur, reglur og ferla sem bankinn hefur sett sér. Lögfræðiþjónusta veitir lögfræðiráðgjöf til allra deilda og sviða bankans til þess að stuðla að því að bankinn starfi í samræmi við lög og reglur. Stefnumótun og ferlar styður bankastjóra við gerð stefnumótunar, viðskiptaáætlunar og framgang þeirra markmiða sem bankinn setur og viðheldur samræmdri sýn á starfsemina. Sameiginlegt hlutverk þessara eininga er að stuðla að skýrri mótun á stefnu bankans til framtíðar, efla góða stjórnarhætti og styðja við að bankinn starfi í samræmi við ytra og innra regluverk á hverjum tíma.

Innri endurskoðun

Innri endurskoðun er sjálfstæð og óháð starfseining sem heyrir beint undir bankaráð. Hlutverk deildarinnar er að auka og vernda virði Landsbankans með áhættumiðaðri og hlutlægri staðfestingu, ráðgjöf og innsæi. Innri endurskoðun leggur mat á og bætir virkni áhættustýringar, eftirlitsaðferða og stjórnarhátta með kerfisbundnum og öguðum vinnubrögðum.

Eignir seldar á árinu 2024

Landsbankinn hefur sett sér skýra stefnu um sölu eigna sem er ætlað að stuðla að gagnsæi og trúverðugleika við eignasölu og efla þannig traust til bankans.

Verðbréf og aðrir fjármálagerningar sem teknir hafa verið til viðskipta á markaði eru seldir á markaði og telst slík sala fela í sér opið söluferli. Slík viðskipti eru því undanskilin í töflu um seldar eignir.

Á árinu 2024 seldi Landsbankinn 533 fullnustueignir, eina fasteign, tvær bifreiðar og 82 listmuni. Heildarsöluverðmæti þessara eigna nam um 1.456 milljónum króna. Undir annað falla helst listaverk sem bankanum er frjálst að ráðstafa án kvaða skv. listfræðilegu mati menntamálaráðuneytisins. Nánar er fjallað um matið í fyrri ársskýrslum. Salan fór fram í opnu söluferli (netuppboð).

Í árslok 2024 voru eignarhlutir í tólf óskráðum félögum í sölumeðferð. Eignarhlutirnir eru ýmist í eigu Landsbankans eða Hamla fyrirtækja ehf., dótturfélags bankans. Upplýsingar um eignarhlutina eru m.a. birtar á vef bankans.

Um áramót var virkt söluferli í gangi varðandi hlut Landsbankans í Greiðslumiðlun Íslands ehf. og hlut Hamla fyrirtækja ehf. í Keahótelum ehf.